Գունավոր և առողջ հաց․ երբ գիտությունը դառնում է ստեղծարարություն

11-րդ դասարանի սովորողները (օտար լեզուների ենթահոսք) ուսուցչուհի Իրինա Աթոյանի ղեկավարությամբ իրականացրին նախագծային աշխատանք՝ «Հաց՝ բնական ներկանյութերի օգտագործմամբ» թեմայով։

Նախագծի նպատակն էր հետազոտել և ստանալ բնական ներկանյութեր ու դրանք օգտագործել հացի պատրաստման գործընթացում՝ վերջնարդյունքում ունենալով տարբեր գույնի ավելի գրավիչ տեսքով ու նոր համի, բացառապես բնական հումքատեսակներով, անվտանգ և անուշաբույր հաց։

Սովորողները ուսումնասիրեցին՝

• հացի ստացման տեխնոլոգիան,

• բնական գունանյութերի տեսակները և ստացման եղանակները,

• դրանց ստացման հումքատեսակները,

• մարդու առողջության վրա ունեցած բարերար ազդեցության հետևանքները։

Որպես բնական գունանյութեր ընտրվեցին՝

ճակնդեղ, գազար, կարմիր կաղամբ և սպանախ։

Ստացվեց խյուս, որը օգտագործվեց խմորի պատրաստման մեջ։

Փորձարարական աշխատանքի ընթացքում խմորը բաժանվեց մասերի, յուրաքանչյուրին ավելացվեց տարբեր բնական գունանյութ, ապա աշակերտները թխեցին հացի տեսակները, և գնահատվեցին արտաքին տեսքի, հոտի և համի հատկանիշների հիման վրա։

Արդյունքը՝ ստացվեցին գունավոր, արտաքնապես գրավիչ ու առողջարար, համային առումով ախորժելի նոր հացատեսակներ:

Ինչու՞ է այս նախագիծը արդիական

Ժամանակակից աշխարհում առողջ սնունդը այլևս ընտրություն չէ, այլ անհրաժեշտություն։

Բնական բաղադրիչների օգտագործումը ոչ միայն բարելավում է սննդի որակը, այլև ձևավորում է պատասխանատվություն սննդային մշակույթի նկատմամբ։

Նախագծի իրականացման վերջնարդյունքում սովորողները ստեղծագործելու, հետազոտելու հմտություն ձեռք բերեցին, զարգացրին իրենց երևակայությունը, ստացան նոր արտադրանք սննդի բնագավառում, և անձամբ համոզվեցին, որ տեսական գիտելիքները կարող են վերածվել իրական, առարկայական, օգտակար, գործնական հմտությունների և կարողությունների։

Աշխատանքի ողջ ընթացքը և գովազդային թռուցիկները վերջում ներկայացվեցին վարժարանի աշակերտներին: