Սիրելի‘ Ծնողներ.
Շնորհակալություն եմ հայտնում մեր անձնական նախաձեռնությամբ հիմնադրած վարժարանի նկատմամբ հավատ ունենալու և երեխայի կրթադաստիարակչական նուրբ ու բարդ գործընթացների իրականացումը մեզ վստահելու համար: Չեմ կարծում, թե մեր համագործակցության ընթացքում դժգոհության առիթներ են եղել:
Միաժամանակ նպատակահարմար եմ գտնում Ձեզ տեղեկացնել, որ վարժարանը անցել է պետականորեն սահմանված ուսումնական պլաններով և առարկայական ծրագրերով ուսուցման կազմակերպման նոր համակարգի` հիմք ընդունելով հանրակրթական չափորոշիչները: Դժվարացել է մանկավարժի աշխատանքը, մեր պահանջները չբավարարող մանկավարժներին աստիճանաբար փոխարինել են մրցույթով անցած առավել փորձառու և նոր մեթոդներով ու հիմնական կարգավիճակով աշխատող մանկավարժներ: Այս չափազանց պատասխանատու խնդիրը լուծելու համար, ինչպես ցույց տվեց տարիների փորձը, պահանջվեց նաև Ձեր աջակցությունը: Մենք համոզվեցինք, որ առանց շահագրգիռ և մոտիվացված ծնող – բարձրակարգ ու բարոյական նկարագիր ունեցող մանկավարժ – կրթությանը անմնացորդ նվիրված տնօրինություն եռակողմ, ներդաշնակ ու փոխըմբռնված աշխատանքի, հնարավոր չէ հասնել նոր պահանջներով վարժարանային յուրահատուկ ծրագրերի կատարմանը: Այնպես որ, Եվրասիա վարժարանը համակողմանիորեն բավարարում է Ձեր պահանջները: Մենք պատասխանատու ենք Ձեր կողմից առաջադրված ծրագրերի իրականացման համար:
Այսօր մեր գլխավոր խնդիրն է ժամանակակից մեթոդական հնարքներով աշակերտին տալ միասնական քննական համակարգի ծրագրային պահանջներով հաստատուն, իրական ու համակարգված գիտելիք,հնարավոր դարձնել հաղթահարելու հանրապետության ու արտասահմանյան երկրների առաջավոր բուհերի ընդունելության մրցութային քննությունները: Բազմաթիվ նուրբ ու յուրահատուկ կրթադաստիարակչական ու մանկավարժական-տեխնոլոգիական բարդ խնդիրները արդեն լուծվում են, հետևաբար, Դուք պետք է զերծ մնաք վարժեցնողների` «ռեպետիտորների» համագործակցությունից:
Փոխվել են ժամանակները, պահանջները, հնարավորությունները…
Ձեր գլխավոր խնդիրն է, որպեսզի երեխան ստանա որակյալ կրթություն. մենք դա ապահովում ենք: Եթե մեր մանկավարժական փորձառու և արհեստավարժ կոլեկտիվի մասնակիցների համատեղ ջանքերով Ձեր նպատակները չիրականացվեն, չեմ կարծում թե որևէ անհատի դա կհաջողվի:
Այս պահանջը լիարժեք կատարելու համար խնդրում եմ.
- նախ և առաջ զերծ մնալ մեր առանձին մանկավարժ-մասնագետների կամ աշխատակիցների կատարած աշխատանքի գերագնահատումից` անտեսելով ամբողջ մանկավարժական թիմի կատարված մեծ ծավալի աշխատանքը: Դա բնորոշ է մասնավոր դպրոցին, որովհետև ուսուցման որակի համար պատասխանատու է նրա հիմնադիր տնօրենը, ումն էլ վերապահված է աշակերտի գնահատման և ատեստավորման պատասխանատվությունը` Ձեր, որպես պատվիրատուի, պահանջների կատարումը:
- լինել շատ ուշադիր երեխայի նկատմամբ: Երբեմն ծնողի զբաղվածության պատճառով առաջանում են անտարբերության դրսևորումներ, որոնք կարող են ունենալ կործանարար հետևանքներ: Այսօր խիստ անհրաժեշտություն է առաջացել երեխային աջակցել, ուժեղացնել վերահսկողությունը և պահանջկոտությունը, երեխայի ստացած Ձեզ չբավարարող ցանկացած գնահատական քննարկել տնօրինության հետ` ներկա դարձնելով ուսուցչին: Համոզված եղե’ք, որ տնօրինությունը իրական գնահատականի է կողմնակից:
- ծանոթանալ և կարծիք հայտնել վարժարանում ներդրված գիտելիքի գնահատման հեղինակային ծրագրին,որը իրականացվում է գրավոր հիմունքներով` կիսամյակում երկու անգամ հաճախականությամբ: Այդ համակարգը նպատակ ունի ոչ միայն աշակերտի ստացած գիտելիքը բնութագրող միավորների փոփոխության շարժը բացահայտել ու կառավարելի դարձնել յուրաքանչյուր աշակերտի ուսուցման ընթացքը, այլ նաև մանկավարժների աշխատանքների կատարած որակի նկատմամբ հսկողության իրականացնել:
- իրազեկված լինել, որ ներկայումս վարժարանը ներդաշնակ անցում է կատարում կրեդիտային ուսուցման և գնահատման համակարգի /առաջինը ՀՀ-ում/, որտեղ բացի ստացված գիտելիքը, հաշվառվում են նաև աշակերտի հաճախումները, ինքնուրույնաբար կատարած աշխատանքների ծավալը /հատկապես հետազոտական/, լսարանում ցուցաբերած ակտիվությունը և այլն: Այսպիսով համակողմանի և համալիր հսկողություն կսահմանվի աշակերտի կատարված բոլոր աշխատանքների նկատմամբ ու պայմաններ կստեղծվեն` հետագայում բուհերում սովորելիս հեշտությամբ հարմարվելու ուսանողական նոր գործառույթներին: Այս մեթոդը ունի աշակերտի` սովորելու նկատմամբ մոտիվացման բարձրացման մեծ ազդեցություն և ցանկալի հետևանքներ է առաջացնում:
- չհամագործակցել կրկնուսույցների հետ /մանավանդ, որ նրանք այլևս որևէ առնչություն չունեն ընդունելության քննություններին/: Այս վարժարանը արդեն համակողմանիորեն կատարում է Ձեր պատվերը, մինչդեռ կրկնուսույցը, անտեղյակ լինելով մեր ծրագրերին և ՀՀ ԿԳ նախարարության օրեցօր փոփոխվող մեթոդական պահանջներին, ընդունելության միասնական քննությունների անցկացման նոր պայմաններին և այլն, մեր համոզմամբ ավելորդ աշխատանք է կատարում , չհաշված երեխայի գերծանրաբեռնվածությունը և մեր հանձնարարությունների թերի կատարումը: Վարժարանի տնօրինությունը ժամանակին իրազեկում է պետական պաշտոնական տեղեկատվությամբ և, համարժեք արձագանքելով, զերծ պահում դիմորդներին միասնական քննությունների հնարավոր անհաջողություններից: Ավելացնենք նաև, որ անհրաժեշտության դեպքում օրվա երկրորդ կեսին վարժարանում անցկացվում են անհատական լրացուցիչ անվճար հիմունքներով պարապմունքներ:
Հարգելի’ ծնողներ,
համոզված եմ, որ մեր համագործակցությունը այսուհետ երաշխավորված կլինի, եթե Դուք առավել հավատով լցվեք այս ինքնատիպ ուսումնական հաստատության նկատմամբ: Մենք գտնվում ենք միևնույն նավակում, սակայն մեր վրա դրված է նավավարի պարտականություն, որը կատարվում է սիրով և արհեստավարժ:
Այսպես է տրվում բարձրակարգ մասնագետ դառնալու մեկնարկը:
Հիմնադիր-տնօրեն, պրոֆեսոր` Ս.Օհանյան
Կարծիքներ, դիմումներ, առաջարկներ և հարցեր ունենալու դեպքում դիմե’ք մեզ` info@eiu.am հասցեով:
